6, 音素之間嘅協調
喺發音嘅過程中，我哋會發現：聲母，韻腹，韻母同聲調之間會發生相互影響，從而導致有啲音素會發生相應嘅變化。
噉需要強調嘅係，呢種相互影響係自然而然嘅結果，係我哋嘅發音肌肉互相協調嘅結果。唔需要刻意噉去學習或者發音。我哋只需要知道有呢種情況存在就得嘞。
下面做一個簡單嘅介紹。
1，對聲母嘅影響
（1）聲調對聲母有小小影響，唔同嘅聲調使到部分聲母嘅發音位置發生小小移動變化。
比如，唔同嘅聲調，會令到：
* 聲母 z 嘅位置喺普通話嘅 z 同 j 之間移動；
* 聲母 c 嘅位置喺普通話嘅 c 同 q 之間移動
* 聲母 s 嘅位置喺普通話嘅 s 同 x 之間移動。
參考資料：1，《廣州話方言詞典》P349，饒秉才，歐陽覺亞，周無忌。
(2) 唔同嘅元音亦可以對聲母產生影響。
比如，唔同嘅元音，會令到聲母[ y ],[ w ], [ kw ], [ gw ]嘅位置往前或者往後發生小小移動。
呢啲情況，平時唔需要去理會。知到有噉嘅情況存在就得嘞。
2，對韻腹嘅影響
對韻腹產生影響嘅音素主要係韻尾。
（1）元音韻尾：
韻腹除咗[ a ]之外，都係緊元音，即係發音肌肉比較緊張。
① 韻腹“e”喺韻尾“i”前面，如果用力，係可以發出緊元音[ ɛ ]嘅。如果放鬆嘅情況下，就會發成鬆元音[ e ]。原因係兩個發音動作靠得太近，互相協調。
② 同樣道理，韻腹“o”喺韻尾“u”前面嘅時候，用力可以發緊元音[ ɔ ]; 如果放鬆嘅情況下，就會發成鬆元音[ o ]。
(2)軟腭位置嘅韻尾：
軟腭位置嘅韻尾有兩個：“k”同“ng”。
①韻腹“i”喺韻尾“k”或者“ng”前面，如果用力，係可以發出緊元音[ i ]嘅。如果放鬆嘅情況下，就會發成鬆元音[ ɪ ]。原因係兩個發音動作互相協調。
②同樣道理，韻腹“u”喺韻尾“k”或者“ng”前面嘅時候，用力可以發緊元音[ u ]; 如果放鬆嘅情況下，就會發成鬆元音[ ʊ ]。原因係兩個發音動作亦係互相協調。
3，對韻尾嘅影響
對韻母產生影響嘅主要係韻腹。
①一個音節中，韻腹係主要成分，韻尾只係一個次要嘅配合成分，所以，韻尾嘅元音“i”，“u”都分別只發鬆元音[ ɪ ]，[ ʊ ]。
②爆破音韻尾“p”，“t”同“k”,爲咗配合前面嘅元音成音節，都失去咗爆破，發成[ p ̚]，[ t ̚ ]同[ k ̚ ]。
4，對聲調嘅影響
對聲調產生影響嘅主要係輔音。明確嚟講，係爆破音。
（1）韻尾“p”,“t”，“k”後面：冇“x”同“q”聲調（即第4，5調）。
（2）非韻尾“p”,“t”，“k”，分兩種情況：
A，送氣爆破音嘅聲母p, t, k, c, kw所在嘅音節：冇“h”聲調（即第6調）。
B，唔送氣爆破音嘅聲母b, d, g, z, gw所在嘅音節：冇“x”同“q”聲調（即第4，5調）。
（註：部分字喺b, d, g, z, gw後面帶有x, 例如：哥哥（goxgoj）, 弟弟（daixdair）,姐姐（zexzej），嘎（gaax)同（box）等。 呢種情況, 由於人類口腔構造嘅限制， x聲調係發唔出嚟嘅。只能發出h嘅重讀。但考慮到電腦係可以合成x聲調，所以保留呢種拼寫。）
以上內容，唔需要刻意學習。了解就可以了。主要是方便大家以后查字典。多練習發音，就可以自然掌握。